Tvillingarnir

Við fórum frekar seint í 6 mánaða skoðunina en hún var loksins í morgun. Vorum mætt út á heilsugæslu klukkan 9 og það er byrjað á því að vigta Freydísi  Ólöfu, hún reynist vera orðin 8130 gr. og 68,5 cm á lengd, ekkert smá stór stelpa. Næst á vigtina var Þórunn Elísa en hún slær systur sinni við að vanda og er orðin 8310 gr en jafn löng eða 68,5cm.  Elín hjúkka var mætt á staðinn og hún er svo skotin í þessum stelpum, þegar hún frétti að þær væru mættar kom hún rakleitt fram til að heilsa upp á okkur. Læknirinn skoðaði þær, bara þetta vanalega, hlusta þær, skoða í eyrun, spyrja um heilsufarið og hreyfiþroskann. Hann var alveg sáttur við við þær á allan hátt enda sýndu þær vel hreyfiþroskann á skoðunarborðinu, þær voru hreint og beint út um allt. En svo kom að leiðinlega kaflanum, það var sprautan en nú er verið að bólusetja þær gegn meningókokkum (sem er víst heilahimnubólga á fínu læknamáli). Systurnar stóðu sig eins og hetjur en það kom smá grátur þegar efninu var sprautað inn því það svíður víst svolítið en það var fljótt búið þegar þær fengu knús og þá var bara brosað aftur.

Á mánudaginn fengum við sko skemmtilega heimsókn en Ásthildur og Dröfn komu loksins að skoða skvísurnar ( fyrir þá sem ekki vita þá er Dröfn æskuvinkona mín og Ásthildur mamma hennar en þær bjuggu í sömu sveit og ég og var mikill samgangur þarna á milli). Þær mæðgur gáfu Freydísi og Þórunni rosalega sæta kolkrabba sundboli sem eiga nú heldur betur eftir að koma sér vel þar sem að sundrottningarnar eru að sprengja gömlu bolina sína utan af sér.

Af sundinu er annars allt gott að frétta, það gengur bara alveg rosalega vel og stelpunum fer framm í hverjum tíma sem líður. T.d. erum við farin að sleppa þeim og í síðasta tíma voru þær látnar kafa á milli okkar, rosa gaman.
Ég man afskaplega illa frá hverju ég á að segja, jú ég get sagt ykkur frá því að þær eru farnar að fara í göngugrind og spæna gjörsamlega upp parketið í henni, flækingurinn er svo mikill. Hvort sem þær er í göngugrindinni eða bara á gólfinu þá ferðast þær annsi langt, þær velta sér um allt eða þá ýta sér afturábak á maganum. Þær eru aðeins farnar að myndast við það að sitja sjálfar en það vantar ennþá svolítið upp á jafnvægið.
Við erum farin að gefa þeim graut á morgnana og svo fá þær smá smakk af eitthverju seinnipartinn, þeim finnst matur rosalega góður og taka við honum með bestu list.
Við höfum reynt að vera dugleg að setja inn myndir þó svo að það hafi ekki verið mikið um skrif.
Eigið góðan dag.

Spáið í því: litlu fallegu stelpurnar okkar eru orðnar svo stórar og fallegar. Í tilefni dagsins er búið að dressa þær upp í kjóla og gera þær rosa fínar. Maður verður nú bara einu sinni hálfs árs. Það eru nokkrir sem eiga afmæli þessa dagana, Tinna varð 24 ára 10 apríl, amma Ellý varð 60 ára 16 apríl, Einar Dan varð 12 ára 18 apríl, Urður og Örvar eiga afmæli í dag, Urður 27 ára og Örvar 21 árs og Þrúður frænka verður 35 ára 24 apríl. (Takk fyrir ábendinguna amma Erla) Það var mataboð hjá okkur á miðvikudaginn í tilefni af afmælinu hennar Ellýar ömmu. Þar voru afmælisbarnið, Gunnar afi og flestir afkomendur þeirra, þeir sem sáu sér fært að koma. Svo var haldin veisla á laugardaginn fyrir aðeins stærri hóp, svona fullorðins veisla svo að á meðan voru Freydís Ólöf og Þórunn Elísa í pössun hjá stelpunum hennar Bjarneyjar og gekk það rosalega vel. Þetta voru fínustu veislur, svaka gaman og afmælibarnið lítur ekki út fyrir að vera deginum eldri en 50 ára.
Ég hendi kannski saman eins og einni köku í dag svo ef þið eruð á ferðinn endilega kíkið við.
Kossar og knús til allra afmælisbarnanna.

Það hefur margt gerst síðan ég skrifaði síðast og ætla ég að reyna að muna eitthvað af því og skrifa það hérna niður. Það hefur verið frekar lítið um sundæfingar eftir páskana en það var ekkert sund á föstudaginn langa, svo voru stelpurnar svo kvefaðar að við slepptum tveim tímum eftir páska, mættum svo í einn tíma á þriðjudegi en á föstudeginum féll niður tími því það kúkaði einhver í laugina.
Á þriðjudaginn síðasta mættum við í sund en það var engin tími því laugin var svo köld en við fórum í heita pottinn og pínku stund í laugina þegar hún var farin að hitna.
Ég ætla því að vona að það verði tími í dag svo stelpurnar geti æft dýfingarnar sínar.

Ég er að reyna að minnka brjóstagjöfina niður í bara eina gjöf á dag því það er búið að vera svo mikið vesen. Ég er alltaf að fá stíflur með tilheyrandi skemmtilegheitum eins og hita og verk í brjóstin. Um daginn fékk ég stíflu sem olli því að ég fékk hita og rosa verk í brjóstið, svo þegar ég var að reyna mjólka stífluna úr mér kom bara grænleitt jukk svona eins og gröftur eða hor (ekki fyrir viðkvæma).  Frekar ógeðslegt. Með því að kreista þetta úr í nokkur skipti tókst mér nú að losna við þetta en ég ætla ekki að taka sénsinn á því að fá svona aftur svo nú er ég bara að þurrka mig upp hægt og rólega.
Þær eru ekkert ósáttar við pelann en það er bara ég sem er að halda í þetta, finnst ég vera svo vond mamma að hætta alveg með þær á brjósti. En ætli maður verði ekki að hugsa svolítið um sjálfan sig líka.

Núna á miðvikudaginn 9 apríl fórum við mæðgur á Selfoss, byrjuðum á því að kíkja í leikskólann Árbæ sem ég var að vinna á og stoppuðum þar í dágóða stund. Krökkunum fundust Þórunn og Freydís alveg æðislegar og voru alltaf að segja að þær væru alveg eins og fannst það svolítið skrítið.
Eftir heimsóknina á leikskólann fórum við til Jóhönnu og Sóldísar Óskar. Það var svo gaman að hitta þær og sjá hvað Sóldís er orðin stór. Sóldís Ósk lá inn á vökudeild með stelpunum og komumst við að því þar að við erum frænkur. Ég held að hálfsystir ömmu Sigríðar sé amma Jóhönnu, er ekki vel að mér í ættfræðinni.
Eftir heimsóknina kíktum við aðeins í Suðurengið en fórum mjög fljótlega til Rúnu Einars og Rutar á Kotströnd. Það var heldur betur kominn tími til. Bæði það að við vorum aldrei búnar að sjá hana Rut með berum augum og líka að mig virkilega vantaði orðið augabrúnir. Þar sem að stelpurnar og Rut eiga alveg eins kjóla þá var smellt af nokkrum myndum.

Í gær, fimmtudaginn 10. apríl, fórum við mæðgur alla leiðina til Keflavíkur í klippingu til Flóru frænku. Það gékk áfallalaust fyrir sig en Freydís og Þórunn hreyfðu sig mun meira í þetta skipið en það síðasta. Þegar við vorum allar orðnar nýklipptar og fínar héldum við áfram til Sandgerðis í heimsókn til Ingu og Gunnars Hólm. Það var rosalega gaman. Gunnar var reyndar sofandi mest allan tímann. Hann er svo duglegur að sofa úti í vagninum sínum. Stelpurnar fóru reyndar út í vagn og lögðu sig í smá stund á meðan mamman borðaði köku inni sem Inga var nýbúin að baka. Namminamm.

Á eftir erum við að fara í ungbarnasund. Í tímanum í dag eigum við að prófa að setja stelpurnar í kaf án þess að blása framan í þær. Það verður gaman að sjá hvernig það tekst. Ég man ekki eftir fleirru í bili svo ef ég hef gleymt einhverju endilega látið mig vita.

Ég henti svo inn nokkrum myndum, til dæmis af dömunum nýklipptum.